Journey to Kalinchok

कालिन्चोक यात्रा

कालिन्चोक जान सबैभन्दा पहिले काठमाडौंको पुरानो बसपार्कबाट चरिकोट सम्म बसबाट जानुपर्छ । आफ्नै बाईक अथबा फोर व्हील गाडी लग्यो भने सजिलो हुन्छ । काठमाडौं बाट चरिकोट सम्म पुग्न लगभग ६ घण्टा जति लाग्छ । बिहान ७ बजे काठमाडौं बाट गयो भने की खाडीचौरमा की मुडेमा खाना खानको लागि बस रोक्छ । खाना चै खाडीचौरको मिठो छ है । त्यहाँ सुनकोशी खोलाको असला माछा पनी खान पाइन्छ ।

खाडीचौर बजार को एक झलक

खाडीचौर बाट चरिकोट तथा जिरी जाने पूल

काठमाडौं बाट साँगा बनेपा धुलिखेल पाँचखाल लामिडाँडा दोलालघाट बलेफी कोठे अन्धेरी खाडीचौर मुडे खरिढुङा हुँदै चरिकोट पुगिन्छ ।

खरिढुङाको एक झलक

चरिकोट बजारमा छिट्टै पुग्नुभयो भने तपाईं दोलखा भिमसेन को दर्शन गर्न पनि जान सक्नुहुन्छ । चरिकोटबाट दोलखा भिमसेनको मन्दिर सम्म जान बाईकबाट २० देखि २५ मिनट लाग्छ । चरिकोट बजार भीमेश्वर नगरपालिका भित्र पर्दछ । यो दोलखा जिल्लाको सबैभन्दा ठुलो बजार तथा ब्यापारिक केन्द्र हो । चरिकोट बजारमा लज तथा होटेलहरुको राम्रो बेबस्था छ ।


चरिकोट बजारको चोक तथा लक्ष्मी लज

चरिकोट बजार को एक दॄश्य

चरिकोट बजार र दोलखाको मनोरम दॄश्य

दोस्रो दिन बिहान चरिकोटबाट हाम्रो यात्रा सुरु हुन्छ । चरिकोट बाट देउराली, गैरी, कुरी हुँदै कालिन्चोक भगवतीको मन्दिरमा पुगिन्छ । चरीकोटबाट कुरी लगभग १९ किलोमीटर छ । चरीकोटबाट आर्मी ब्यारेकको बाटो हुँदै उत्तर तर्फ उकालो लागेको करिब ४० मिनट देखि १ घण्टा भित्रमा देउराली पुगिन्छ । देउरालीमा चिया नास्ताको ब्यबस्था छ । त्यहाँ चिया नास्ता खाएर जानु भयो भने राम्रो हुन्छ किनभने त्यसपछी धेरै माथि मात्र गैरी भन्ने ठाउँमा मात्र चिया नास्ता पाईन्छ । त्यसपछी देउराली बाट गैरी सम्म उकालै उकालो बाटो जानु पर्छ। यदि बाईक बाट यात्रा गर्दै हुनुहुन्छ भने बिस्तारै जानु पर्ने हुन्छ । बाटो त्यती राम्रो छैन ।

देउराली भन्दा माथि नराम्रो बाटोमा बाईक चलाउदाको दॄश्य

गैरी आइपुग्नु लाग्दा नराम्रो बाटोमा बाईक चलाउदाको दॄश्य

करिब १ देखि साडे १ घण्टामा गैरी भन्ने ठाउँमा पुगिन्छ । गैरीमा याकको मिठो छुर्पी पाउछ । गैरी बाट करिब १ देखि साडे १ घण्टामा कुरी बजार भन्ने ठाउँमा पुगिन्छ । बाईक अथबा गाडीबाट जाँदा कुरी सम्म मात्र जान सकिन्छ । त्यही दिन चरिकोट फर्कन गार्हो हुने भएकोले कुरीमा नै खाना तथा बस्नको लागि ब्यबस्था मिलाउनुपर्ने हुन्छ । खाना तथा बस्नको लागि ब्यबस्था मिलाईसकेपछी कालिन्चोक भगवतीको मन्दिर भएको डाँडा तिर उकालो जानुपर्छ ।

गैरी गाउँको एक दॄश्य

कुरी बजारको एक दॄश्य

करिब १ देखि साडे १ घण्टामा कालिन्चोक भगवतीको मन्दिरमा पुगिन्छ । यस ठाउँमा बडा दशै तथा चैते दशैमा मेला लाग्छ । बडा दशैको मेलामा जाने हो भने न्यानो न्यानो लुगा लगाएर जानु पर्छ । यो बेलामा यहाँको मौसम चिसो हुन्छ । माथि कालिन्चोक भगवतीको मन्दिरमा पुजाआजा गरिसकेर त्येही दिन तल कुरी बजार फर्कनु पर्छ । माथि बस्ने ठाउँ छैन र धेरै जाडो पनि हुन्छ । कालिन्चोक भगवतीको मन्दिर भएको डाँडाबाट सफा मौसम भएको बेला कोदारी भञ्ज्याङ र रोल्वालिङ हिमश्रीङ्खला राम्रो सँग देखिन्छ । यो समुन्द्र सतह देखि ३९५० मिटर को उचाईमा छ । माथिबाट फर्के पछि कुरी बजार मा आएर बस्नुपर्छ । भोलिपल्ट बिहानै ४ बजे तिर फेरि कालिन्चोक भगवतीको मन्दिर भएको डाँडातिर जनुभयो भने तपाईंले सुर्योदयको तथा रोल्वालिङ हिमश्रीङ्खलाको दॄश्य हेर्न तथा फोटो खिच्न सक्नुहुन्छ । त्यहाँ जादा क्यामॆरा लान नबिर्सनु होला है ।